Addis Ababa (Halbeegnews)– Xukuumadda Ethiopia ayaa albaabada iskugu dhufatay wergeys todobaadleh ah oo ka soo baxaayey dalka Ethiopia oo lagu magacaabo Fetah, Shariikadda ay dawladdu leedahay ee daabicista ee loo yaqaano Barhanena Selam ayaa qoraal ay sii daysay shallay ku sheegtay in ay dawladdu gebi ahaanba kaga joojisay inay u daabacdo Wergeyskaasi ugu yaraan 30,000 oo nuqul oo ay todobaadii daabici jireen.

Xukuumadda Ethiopia ayaa ku eedeeyey Wergeyska Fetah inay faafiyeen warar ku lidi ah ayey yidhaahdeen ammaanka guud ee dalka Ethiopia isla markaana waxay dawladda Ethiopia xaqiijisay inay tallaabo sharci ah ka qaadi doonto.

Dhinaca kalana suxufiyiinta ka hawl-galla magaalada Addis ababa ayaa xaqiijiyey in Ra’isal wasaaraha Ethiopia Meles Zenawi uu dalka dib ugu soo laabtay isagoo caafimaad qaba, waxaana la sheegay inuu maanta guddoominaayey shirkii golaha Xukuumadda ee dalka Ethiopia.

Wergeysyada dalka Ethiopia iyo kuwa dibadda ayaa si weyn uga hadlaayey xaaladda caafimaad ee Zenawi iyagoo qaarkoodna kaba dayriyey, taasi oo shaki weyn ku keentay cidda maamusha dalka Ethiopia.

Halbeegnews, Addis ababa

halbeegnet@gmail.com