Laascanood (Halbeegnews)–Ciidamada amaanka gobolka Sool oo maalmihii u dambeeyay hawl-gallo ay amaanka ku sugayeen ka waday Magaaladda Laascaanood ee xarunta Gobolka Sool ayaa ku guulaystay inay gacanta ku dhigaan tiro dagaalyahano Al-shabaab ah, kuwaasi oo ku dhuumaalaysanayey Laascaanood.

-galadoodan ku soo qabtay tiro dad ah oo maamulka gobolkaasi ku sheegay inay yihiin Al-shabaab gobolka ku soo duushay, kuwaasi oo baadhitaanadoodu ka socdaan saldhigyada ciidamada ee lagu hayo.

Badhasaabka gobolka Sool Maxamed Maxamuud Cali (Jeeni-yarre) ayaa sheegay in ciidamada amaanka ee booliska iyo Milatarigu ku guulaysteen inay soo qabtaan kooxo Al-shabaab ah oo dhibaato gobolka Sool ku haya, isaga oo qabashadaasi ku macneeyay guul u soo hoyatay qaranka Somaliland.

Guddoomiyaha Sool oo xalay khadka telefoonda ugu waramay Wargeyska Madaxa-banaan ee Waaheen ayaa sheegay in hawlada ciidamadu socdaan ilaa 29-kii bishii horena la qabtay tirro dagaalyahano Al-shabaab ah “Habeen kaliya maanaan qaban ee dhowr habeen ayaanu qabqabanay, waliba raggii fuliyey falkii lagu dilay ku xigeenkii xeer ilaaliyaha gobolka Sool waanu qabanay iyo kuwo kale oo Al-shabaab ahaa oo iyagga la koox ahaa” ayuu yidhi Guddoomiyaha gobolka Sool Mr Jeeni-yarre, waxaanu intaa ku daray inay hore gobolka uga sifeeyeen Al-shabaab, balse ay hadda duulaan ku soo qaadeen “Nimankaa Al-shabaab gobolka hore ayaanu uga cidhib tirnay laakiin hadda way soo duuleen, anaguna heegan ayaanu u nahay habeen iyo maalinba, markaa habeen hore rag badan-baa la qabtay oo baadhistoodu way socotaa”

Badhasaabka Sool Maxamed Maxamuud Cali (Jeeni-yare) waxa uu xaqiijiyey in dagaalyahanada Al-shabaab ee ay qabteen uu ku jiro nin u dhashay dalka Portugal, kaasi oo ka tirsan dagaalyahanada shisheeye ee Al-shabaab gacanta siiya “Xitaa waxaanu haynaa nin ajaanib ah oo Portaqiiska oo ka mid ah raggii waxan ka shaqeyn jiray oo Al-shabaab ah, qabashadiisana waxa ku guulaystay maamulka Gobolka Sool, Booliska iyo Milatarigiisu, markaa guulahaas ayaanu gaadhnay”ayuu yidhi.

Guddoomiyaha Sool waxa kale oo uu ka hadlay Madax-dhaqameed dhawaan Magaaladda Laascaanood ku soo bandhigay nin ay sheegeen inay u xuleen inuu uga qayb-gallo baarlamaanka loo samaynayo Somaliya “Waxaa idaacadaha ayaan ka maqlayey, dadkuna dawlad ayuu leeyahay oo hogaamisa, arinkaana dawlada dhexe ayaa qaabilsan, laakiin beel beelaha Somaliland ka mid ah oo gaar u tashan karta oo Somaliya taggi kartaa ma jirto

Awood waanu u leenahay laakiin waa wax aan dib u dhici doonin, waana khalad dhacay anaga nagama hoos bixine”ayuu yidhi.

Ka sakow qabashada shakhsiyaadka Al-shabaab lagu xidhiidhiyey, hawl-gallada ciidamada amaanku wadaan ayaan ahayn kuwo ku kooban Laascaanood, balse hawl-gallo ay ka sameeyeen Magaaladda Hargeysa ayaa waxay ku xidheen dad door ah, kuwaasi oo uu ka mid yahay nin ka mid ah shaqaalaha shirkada DAHABSHIIL

Waaheen

Halbeegnews, Laascanood

halbeegnet@gmail.com