Hargeysa (Halbeegnews)– Sida masuul ka tirsan DKMG oo saldhigiisu yahay magaalada London caawa u xaqiijiyey shabakadda caalamiga ah ee Halbeegnews Wasiirka arrimaha dibadda Xukuumadda Madaxweyne Siilaanyo oo isagu habeen hore soo gaadhay magaalada London ayaa noo xaqiijiyey inuu caawa hotel ku yaalla magaalada London kula kulmay Wefdigii ka socday dhinaca TFG-da ee la filaayey in maalinimada arbacadda uu kulanku u furmo dhinaca Somaliland.

Warku wuxuu noo xaqiijinaya in xubnaha Ergadda TFG-da ee uu hogaaminayo Wasiirka arrimaha gudaha Cabdisamad Macalin Maxamuud ay Wasiirka Khaarajiga Somaliland Maxamed Cabdilaahi Cumar ay isku xidheen qol ka mid ah qolalka hotelka halkaasi oo ay ku yeesheen kulan albaabada la isku xidhay oo aan la garaynin wixii lagaga hadlaayey sida uu  noo xaqiijiyey Masuulkaasi.

Masuulka oo aanu weydiinayo bal inuu tafaasiil gaar ah naga siiyo waxyaabaha keeni kara in kulankani qarsoodiga ahi caawa dhex maro Wasiirka Khaarajiga Siilaanyo iyo wefdiga TFG-da wuxuu sheegay in ay u badantahay inay ka wada hadlayeen kulan bishani June 30-keeda ay Madaxweynaha Somaliland Axmed Siilaanyo iyo Madaxweynaha TFG-da Sheekh Shariif ku yeelanayaan magaalada Dubai ee dalka isku tagga Emirateka carabta kulankaasi oo uu dalbaday Madaxweynaha TFG-du Sheekh Shariif, masuulkaasi oo ka gaabsaday inuu magaciisa la xuso ayaa wuxuu yidhi “waxay u badantahay inay kulanka kaga wada hadlayeen, is arag Siilaanyo iyo Shariifka bisha 30ka loo qorsheeyey” ayuu yidhi.

Halbeegnews, Hargeysa

halbeegnet@gmail.com