As Salaamu Calaykum Wa Rahmatullaahi Wa Barakaatihi

Gudida Beesha Habaryoonis ee Waqooyiga Ameerika, kadib markay baadheen, ay ka baaraandegeen ee ay si wanaagsan u falanqeeyeen Dhacdadii Bariga Caasimadda Somaliland ee 15kii Bishan May, 2012, waxay baaqan u soo jeedinayaan Madaxweynaha iyo Goleyaasha Sharidejinta Qaranka Somaliland.

Baaqaas oo ay ku cabirayaan shacuurtooda, kuna xusayaan qodobadan muhiim ka ah:

1. Inay aad uga xunyihiin dhacda ay iskaga horyimaadeen kooxda dhalinyarada ah iyo qayb ka mid ah Ciidanka Qaranak ee sababtay dhimashada iyo dhaawaca xubno ciidanka ka mid ah iyo dad rayid ah, ee hoos u dhac ku keentay sumcaddi Qaranka Somalialnd.

2. Inay aaminsan yihiin inuu yahay qaladka ugu horeeye ee sababay qaladada kale ahaa talada iyo amarka ciidanka lagu dejiyay dhulka lagu muransanaa ee khilaafu ka taagana mudda dheer, xalintiisana loo bilansanaa in si dhaqso loo soo afjaro. Ciidankaas oo sida warku nagu soo gaadhay la dejiyay dhulkaas maalintii dhacdada shaqaaqada ka horaysay.

3. Inay u arkaan inay dhalinyaradu aad ugu qaldanaayeen weerarkay ku qaadeen ciidanka dhulkaas soo degay

4. Inay aaminsan yihiin inay qalad wayn, degdeg iyo masuuliyad-daro ahayd taldadii lagu gaadhay in Maxkamada Militari la soo taago dhalinyarada lagu eedeeyay inay ciidanka weerareen. Degdegaas iyo masuuliyad-daradaas oo khasaare badan u gaysatay Sumcada  Dawlada iyo Dalkaba, una ekay siisay inay Somaliland ku jirto xaalada dagaal iyo deganaansho-liyeed oo caalamka oo dhan lagu baahiyay.

5. Inay dhaleecaynayaan ” Si-xun wax u-sheega”  ay ka mid yihiin warbaahinta qaar wararka si qaldan u faafiyay iyo dad muraad siyaasadeed leh oo dhacdada uga hadlay si aan haboonayn oo khatar u keenaysa Amniga iyo Sumcada Qaranka; Dadkaas oo adeegsaday eryada “maleeshiyo Beeleed” ..iwm

6. Inay si buuxda ugu taageerayaan Madaxda beesha iyo Xukuumadda Somaliland  xal u-helida mashaqada dhacday iyo xaalada ay abuurtay.

Si loo suggo Nabadgalyadda dalka, loona hubiyo Xasiloonida Ciidanka Qaranka; Si loo kasbo Kalsoonida Shacbiga;  Si ay Sumcadda Dimuqraadnimo iyo Cadaalad-sugineed  ee Dawladda Somliland uga kabato dhaawacii dhacdadaasu gaadhsiisay,  waxay Qurbejooga Beeshu u soo jeedinayaan Madaxweynaha Somaliland, Mudane Ahmed Mohamed Mohamoud, qodobada hoose ku qoran:

1. Inuu  talaabo ku haboon ka qaado ciddii  bixisay ama wax ka ogayd amarka ina dhaxalsiiyay mashaqadii  Caasimadda ka dhacday, iyo talaabooyinka masuuliyad-daro ee sababay dhimasho iyo dhawac dad ciidanka ka mid ah iyo dad rayid ah oo aan waxba galabsan, iyadoo la heli kari lahaa xal saliim ah iyo arrinta oo nabadgalyo lagu dhameeyo.

2. In  gudi loo saaro, oo ay soo baadho sababta xal loogu heli waayay khilaafka dhulkaas intaan qasaarahanu dhicin iyo waxa ay hayadaha dawladu u ogaan waayeen waxna uga qabanwaayeen intaanay arrintaas halkaas gaadhin (Governmental transparency and accountability).

3. In kiiska dhalinyarada lagu eedeeyay shaqaaqadaa si dhaqso ah looga wareejiyo maxkamada militari oo lagu wareejiyo maxkamad rayid ah .

Gunaanad ahaan, waxay ku baraarujinayaan Dadka Reer Somaliland Dawlad iyo shiciba inay meel uga soo wadajeestaan illaalinta midnimada, xasiloonida iyo nadgalyadda Dalka iyo Dadkaba.

Somaliland ha guulaysato, ha jirto, hana waarto!